/p. 11/ Hic ego non dicam coelum ab igne non destrui,
quia nullum credo esse prope coelum nec
alibi ignis elementum, ut alias fortasse probabo.
Sed, mitioribus utens verbis, concedo ignem
esse coelo contiguum, in illud tamen non agere.
Nec enim verum est quod ais, quaecunque
communem materiam habent, ea inter se agere aut
pati mutuo; sed id evenit ibi tantum, ubi contrariae
sunt qualitates. Quare in coelo, cum non sit affectio
ijs, quae in igne sunt, affectionibus contraria
(sunt enim secundum Peripateticos diversi generis,
nam differunt per corruptibile et incorruptibile,
contraria autem sub eodem genere
sunt) coeli qualitates ab ignis qualitatibus non
destruentur. Alex. – Erudita sane responsio. Iam vero
per Aristotelis Genium te deprecor id mihi explices:
materia coeli estne eadem in omnibus coeli
partibus? I. C. – Hieronymus Cardanus,[1] Subtilitatum
Professor et de nobis optime meritus, pernegat.
Alex. – Qua vero ratione fretus? I. C. – Quia non
eundem ad modum cuncta lucent astra. Alex. – At
quomodo divinum illud animal ex diversis compositum
est materijs? Sane duae si essent materiae,
duae etiam formae. Tu vero dic quid sentis.
I. C. – Non plures esse in coelo materias, sed
plus materiae in una coeli parte quam in alia;
quare densitate et raritate, non materiei diversitate,
coeli partes differre mihi credendum duco.
Aristotelis namque sum alumnus, nec poenitet.
Is[2] me docuit eandem esse coeli et stellarum substantiam,
et Averroës[3] negat in coelo heterogeneitatem;
hinc veterum Philosophorum, qui stellam in